B. L. Messire HENRY DE MESME, gentilhomme Parisien, sieur de Roissy & de Malasisse, Conseiller du Roy & Maistre des Requestes ordinaire de son hostel, Chancelier du Roy de Navarre, apres la mort du sieur de Francour, nommé Gervais le Barbier, duquel nous avons parlé cy devant. Cetuy cy est fils de Messire Jean Jaques de Mesmes, premier & ancien maistre des Requestes soubs François 1.Henry 2.François 2. & Charles 9. lequel mourut l'an 1569. Nous ferons plus ample mention dudit Jaques par cy apres en son rang. Encores que nous n'ayons rien veu mis en lumiere par Monsieur de Roissy, si n'est il pas à croire qu'il n'aye dressé plusieurs cayers & memoires, touchant le maniement des affaires qu'il a executees en sa charge de Chancelier & de maistre des Requestes, lesquelles choses s'il luy plaisoit de faire imprimer, ensemble le grand nombre de livres Grecs, Latins, François & autres en nombre infiny qui sont en sa Bibliotheque tous escrits à la main, il obligeroit beaucoup son siecle & la posterité, à luy en rendre graces, & le remercier d'un si grand bien: ce que j'espere qu'il fera, pour se rendre de plus en plus aymé, & favory des hommes de lettres. Il florist à Paris ceste annee 1584.