B. L. CHARLES ESTIENNE, Parisien Docteur en medecine frere de Robert Estienne, & oncle de Henry, &c. cette maison des Estiennes a esté heureuse à produire des hommes doctes, & entre autres cestui-cy pere de Nicole Estienne femme de M. Jean Liebault Docteur en Medecine à Paris, de laquelle nous ferons mention cy apres. Il a traduit ou plustost paraphrasé de Latin en François la Veterinaire de P. Vegece touchant les maladies des chevaux, & leurs remedes ou guarison. Il a escrit un traicté particulier de la description d'un chacun oyseau de proye, desquels livres il fait mention en sa maison rustique. Il est autheur des xxv. paradoxes, imprimez à Lyon par Thibault Payen l'an 1555. La guide des chemins pour aller & venir par tout le Royaume de France, composee & imprimee l'an 1553. par luy-mesmes avec le Catalogue des fleuves & rivieres de France, &c. Il promettoit une autre guide generale à l'imitation d'Antonin, non encores imprimee. Il a traduit d'Italien en François la Comedie des Abusez, imprimee à Paris l'an 1540. Discours des histoires de Lorraine & de Flandres, imprimees par luy l'an 1552. L'abregé de l'histoire des Vicontes & Ducs de Milan, extrait en partie de Paule Jove, imprimé à Paris avec les protraicts d'iceux par ledict Estienne l'an 1552. L'Agriculture ou Maison rustique escrite en Latin par luy, & depuis traduite en François par luy-mesmes, & adjoustee par son gendre Jean Liebault, duquel nous parlerons cy apres, imprimee à Paris chez Jaques du Puis par plusieurs fois, & chez Plantin à Anvers. D iiij La dissection des parties du corps humain, divisee en trois livres, avec les figures & declaration des incisions, &c. escrite en Latin par Estienne de la Riviere, & traduicte en François par ledit Estienne, imprimée à Paris chez Simon de Colines. Il a peu escrire plusieurs autres livres desquels je n'ay pas eu cognoissance. Il mourut à Paris l'an 1564. sous Charles 9.