B. L. JEAN CALVIN OU CAVVIN ET CHAVVIN, dit en Latin Calvinus, & par Anagramme Alcuinus, soubs lequel nom, il a mis des oeuvres en lumiere, afin de voir ce que lon en jugeroit, sans que l'on sçeust qu'ils fussent de sa façon, &c. Il nasquit en la ville de Noyon en Picardie l'an 1509. le 10. de Juillet. Il fut grand Ministre & le chef de l'Eglise de Geneue apres Guillaume Farel. Il a escrit plusieurs livres tant en Latin qu'en François, & entre autres son institution Chrestienne, imprimee tant de fois, & tant alleguee par tous les Theologiens qui ont escrit contre luy. Quant à ses autres oeuvres en François, tant sur le nouveau Testament, que sur le vieil, & touchant les Sermons & leçons & autres traictez, imprimez en divers lieux, ensemble ses responses au Cardinal Sadolet & autres, je n'en feray pas icy plus ample mention, de peur de tomber en l'inimitié de plusieurs, lesquels ne desirent que l'on face un recit de ses oeuvres: toutesfois le catologue en est bien ample au livre des livres censurez par Messieurs de la Theologie de Paris, & au catalogue des livres defenduz & prohibez par le Concile de Trente. Theodore de Beze en a aussi fait mention au discours de la vie dudit Calvin & autres en nombre infiny. Il mourut à Geneue l'an 1564. âgé de 56. ans.