B. L. CHRESTOFLE PLANTIN natif du pays de Touraine. Cettui-cy merite tant de recognoissance envers les hommes de lettres & tous autres amateurs des arts & sciences, que je serois reputé par trop desdaignant les studieux du profit public, si je ne le mettois au nombre des autres qui ont prins peine d'illustrer nostre siecle par les beaux livres qu'ils ont fait imprimer à leurs fraiz & despens, entre lesquels le seigneur Plantin a cet honneur d'avoir tant imprimé de beaux liures en toutes langues, & en si grand nombre qu'il seroit presque incroyable, comme il a peu satisfaire à tant de fraiz & fournis à tant d'impressions. Mais en celà il doibt louër Dieu grandement, & luy rendre graces de ce qu'il a peu si long temps soustenir (avec tant d'honneur) un si pesant fardeau, accompagné de tant de coust & mise d'argent. Il se voit plusieurs Epistres, Prefaces, & autres semblables advertissements mis au devant des oeuvres qu'il a imprimez, je ne veux pas nier qu'il ne soit autheur d'iceux, ou qu'il n'en puisse faire de semblables. Il florist à Anuers ville capitale de la Duché de Brabant, cette annee 1584. & y a fait sa demeure depuis 20. ou 30. ans en çà.