GILLES CORROZET Parisien, nasquit en la ville de Paris le quatriesme jour de Janvier l'an 1510. Cestuy-cy encores qu'il n'eust esté entretenu aux estudes, toutesfois ayant un grand jugement & esprit esmerveillable, il n'a laissé d'aprendre les langues, Latine, Italienne & Espagnole, & se voyent tant de son invention que de sa traduction, plusieurs livres que luy-mesmes a imprimez, sçavoir est. Les antiquitez, chroniques & singularitez de Paris, imprimees par luy l'an 1561. Le catalogue des Villes & citez de la France & des Gaulles, imprimé à Paris chez Denis Janot l'an 1538. & l'an 1540. & depuis à Lyon l'an 1556. & à autres diverses fois, avec le second livre de Claude Champier Lyonnois, fils de Symphorian &c. Il a traduit de Castilan en François, la prison d'amour, imprimee en langue Espagnole & Françoise, soubs le nom de Carcel d'Amor, à Paris l'an 1567. par ledit Corrozet & Robert le Mangnier, & depuis imprimee à Anuers & en autres lieux. Recueil d'epitaphes singuliers de plusieurs dames illustres, traduits d'Italien en François. Le tresor de vertu, ou sentences recueillies de plusieurs autheurs, traduit d'Italien en François, & imprimé en ces deux langues à Paris, & à Lyon. Le premier & second livres des fables d'AEsope, imprimez. Brefve instruction catholique aux Chrestiens, imprimee à Paris l'an 1566. La plaisante & agreable histoire d'Apolonius, prince de Thir en Afrique, & Roy d'Antioche, traduite par ledit Corrozet en ses jeunes ans, imprimee à Paris par Alain Lotrain, & Denis Janot. Epitaphes sur le trespas de Messire Robert de la Marche, seigneur de Florenges, Mareschal de France &c. imprimez à Paris par ledit Corrozet & Jean André l'an 1536. Hecatongraphie, c'est à dire les descriptions de cent figures ou histoires & Emblemes, contenans plusieurs sentences & proverbes, tant des anciens que des modernes, imprimee à Paris chez Denis Janot l'an 1543. Il a traduit d'Italien en François, l'histoire d'Aurelio & Isabella, imprimee à Paris & à Lyon. La Tapisserie de l'Eglise catholique, escrite en vers François, par dizains & huictains, contenant la mort & passion de nostre seigneur Jesus Christ, imprimee à Paris. Plusieurs instructions & enseignemens, ensemble plusieurs nouveaux proverbes, demandes & joyeux quolibets, composez en vers François, & imprimez. Les divers propos memorables de toutes sortes d'hommes illustres, imprimez à Lyon par Gabriel Cotier l'an 1560. & à Paris par Galiot du Pré l'an 1567. & à plusieurs autres fois. Le Tableau de Cebés, traduit par ledit Corrozet en vers François, imprimé à Paris par Loys Janot l'an 1543. Les fleurs de poësie, traduites d'Italien en vers François. Le conte du Rossignol, imprimé à Paris l'an 1546. par ledit Corrozet, & depuis à Lyon par Jean de Tournes l'an 1547. Il a traduit les livres de Gabriel Symeon Florentin, contenant l'origine & les faits de Venise, de Milan & de Mantouë, imprimez à Paris par luy-mesmes. Epitome des histoires des Rois d'Espagne, de Castile, d'Arragon, de Boheme, Hongrie, & des maisons d'Ausbourg & Austriche, le tout recueilly par ledit Corrozet, & imprimé par luy-mesmes à Paris l'an 1553. Le Parnasse des Poëtes François modernes, imprimé à Paris depuis sa mort. Le thresor des histoires de France, reduites par tiltres, imprimé à Paris chez Galiot Corrozet, fils du susdit l'an 1583. Recueil d'aucunes histoires de France, par lieux communs, depuis Pharamond jusques au regne de Charles neufiesme &c. Je ne sçay si c'est ledit livre du tresor des histoires, lequel a esté imprimé apres sa mort. Trente chants royaux, composez par ledit Corrozet d'an en an, pour le May de nostre Dame à Paris. Le conseil des sept sages, escrit tant en prose qu'en vers, imprimé à Lyon chez Jean de Tournes l'an 1549. L'entree de l'Empereur Charles le quint, imprimee à Paris. Les preceptes de Jesus-christ, avecques aucunes oraisons. Il a traduit d'Italien en prose Françoise la Deiphire, imprimee. Les pompes & funerailles de Monsieur le Duc de Guise. Le jeu de l'adventure des hommes & des femmes. Les blasons domestiques, ou inscriptions pour mettre à tous les endroicts de la maison, imprimé. Les exemples des oeuvres de Dieu, escrits en vers François. Les Quadrains de la Bible, autres que ceux de Paradin &c. Le blason des couleurs en armoiries, imprimé. Le jeu des cartes, escrit en vers. Il peult avoir escrit plusieurs autres livres, soit de son invention ou autrement, desquels je n'ay pas cognoissance. Il mourut à Paris le quatriesme jour de Juillet l'an 1568. âgé de 58. ans ou environ.

GILLES CORROZET Parisien (duquel nous avons parlé & racompté ses oeuvres cy dessus au premier Alphabet) Il a escrit les livres qui s'ensuyvent, outre ceux que j'ay recitez icy dessus, desquels derniers livres j'ay receu l'advertissement, de son fils Galiot Corrozet, Libraire tenant sa boutique au Palais de Paris &c. sçavoir est. Le Temple de Paix, fait à la loüange du couronnement de Madame Alienor Royne de France, seconde femme de François 1. du nom, imprimé a Paris. Le triomphe des François sur la confusion & fuite de l'Empereur, Espagnols, & Bourguignons, imprimé à Paris & autres lieux. Deploration sur le trespas de tres-noble Princesse Madeleine de France, Royne d'Escosse imprimee l'an 1537. Le retour de la Paix, escrit en vers François imprimé in 4. Satyre contre fol amour, imprimee avec le manuel d'Epictete & plusieurs autres traictez tant en vers qu'en prose, desquels nous avons fait mention cy dessus, au fueillet 128. auquel je renvoye les lecteurs pour voir ses autres oeuvres.