B. L. Messire GUILLAUME DU BELLAY, seigneur de Langey Chevalier de l'ordre du roy, & Vice-roy en Piedmont du temps de François 1. Roy de France. Il estoit fils de Messire Loys du Bellay sieur de Langey & de Glatigny pres Montmirail au Perche, auquel lieu de Glatigny ledit Guillaume nasquit l'an 1498. ou environ. Sa mere s'appelloit Marguerite de la Tour-Landry. Cette maison du Bellay est l'une des plus anciennes & nobles de tout le pays d'Aniou, de laquelle ceux-cy sont sortiz puisnez, comme aussi est celle de la Tour-Landry à trois lieuës d'Angers. L'on trouve imprimé soubs le nom dudit sieur de Langey, l'instruction de l'art militaire, de laquelle aucuns pensent que Messire Anne de Montmorency Connestable de France soit autheur: mais ce qui me fait penser, que s'en doive estre une autre non encorees imprimee, c'est que lisant ce livre j'y ay trouvé que l'autheur d'iceluy loüe for le Seigneur de Langey Messire Guillaume du Bellay & le recommande pour les lettres & les armes: ce qui me fait croire qu'il n'en est pas autheur, mais que cela est advenu que l'on ait trouvé ces memoires dans sa Bibliotheque, sans le nom de celuy qui l'eust fait, & que l'on a presupposé que se fust de sa façon, à cause qu'il avoit promis d'en escrire. Je n'asseure pas que ce soit de luy, & aussi je ne l'improuve pas. Or venons à ses autres oeuvres tresdoctes, lesquels il a composez. L'epitome de l'antiquité des Gaules & de France, imprimé à Paris par Vincent Sertenas l'an 1556. Plusieurs Dialogues, Epigrammes, Elegies, Sylues, Epistres, Panegyriqs faisans mention des choses arrivees de son temps, desquels il parle en son prologue imprimé avec l'antiquité des Gaules, & racompte encores celles-cy. Les Dits, faits, & choses memorables de la Gaule & de France. Recueil ou vocabulaire par ordre d'A, B, C, de toutes les provinces, citez, villes, chasteaux, montagnes, valees, forests, rivieres, & autres lieux de ce royaume avec l'exposition des appellations d'iceux, & des batailles, rencontres, sieges & autres choses dignes de memoire qui se trouvent y estre advenues, non encores imprimé. Recueil d'exemples des dits & faits memorables des François, à l'jmitation de Valere le Grand historien Latin, & un autre à l'exemple de Plutarque de la conference des vies & gestes d'aucuns Roys, Princes, & capitaines de ce Royaume, avec celles d'aucuns autres Grecs, Latins & Barbares, non encores imprimé. L'Ogdoade, qui est un oeuvre contenant huit livres, duquelles fragments se voyent imprimez à Paris chez Pierre l'Huillier avec les Memoires de Messire Martin du Bellay son frere. Monsieur de Roissy, Messire Henry de Mesmes, (duquel nous parlerons en son lieu) a quelques oeuvres dudit sieur de Langey escrites à la main, comme aussi nous en avons par devers nous, mais de ses lettres ou epistres seulement lors qu'il estoit envoyé en Ambassade pour le Roy François son maistre, tant en Italie qu'en Almagne. Il a escrit en Latin l'histoire des François, laquelle il a depuis traduite en nostre langue par le commandement du Roy, & traite principalement des choses advenues durant le regne dudit Roy, non imprimee. Il a traduit de Latin en François plusieurs epistres, oraisons, harangues, & autres semblables choses, envoyees par le Roy François 1. aux protestants d'Almagne, comme nous avons dit cy dessus parlant du Roy François 1. Epistre du sieur de Langey envoyee à un secretaire Aleman, imprimee à Paris. Epistre ou oraison consolatoire au Roy François 1. du nom, lors qu'il estoit prisonnier en Espagne. Elle se voit escrite à la main au cabinet de Messire René du Bellay Baron de la Lande, heritier dudit sieur de Langey, comme aussi se voit l'Epistre qu'il envoya à Madame la Duchesse soeur du Roy François 1. Il a escrit plusieurs poësies Françoises amoureuses & autres, lors qu'il estoit en jeune âge, non encores imprimees. Discours sur les occasions qui remirent le Roy & l'Empereur en guerre, depuis le traicté de Cambray, non imprimé. Discours du voyage de l'Empereur en Provence, non imprimé. Harangues prononcees devant le Pape, l'Empereur & autres Seigneurs de l'Empire, ou Princes tant estrangers que de France, non encores imprimees. L'oraison faite en faveur du Roy Jean de Hongrie, de la guerre contre le Turc, traduite de Latin en François par ledit sieur de Langey. Lettre escrite à un Aleman, sur les querelles & differens d'entre Charles 5. Empereur, & le tres-Chrestien Roy de France, François 1. du nom. Cette lettre & l'oraison susdite, ont esté imprimees à Paris par Vincent Sertenas l'an 1556. aveques l'epitome de l'antiquité des Gaules. Ses autres oeuvres sont au cabinet de Monsieur le Baron de la Lande Son heritier, lesquelles il mettra en lumiere quand il luy plaira, pour le Soulagement du publiq, & pour l'ornement de nostre France. Quant aux oeuvres en Latin, escrits par ledit sieur de Langey, nous En ferons mention dans nostre Bibliotheque Latine. Il mourut à sainct Saphorin au mont de tarare pres Lyon, le 9. Jour de Janvier l'an 1543. âgé de 47. ans ou environ. Sasepulture se voit superbement & magnifiquement eslevee en marbre dans l'Eglise de S. Julien du Mans, par Messire Jean du Bellay Cardinal & Evesque de Paris son frere puisné: pour le respect que je porte à ce defunt, je mettray icy l'Epitaphe, lequel j'ay fait imprimer par cy devant en mes autres oeuvres. CY GIST LANGEI, QUI DE PLUME ET D'ESPEE, A SURPASSÉ CICERON ET POMPEE. J'ay fait un tresample discours de la vie dudit Seigneur, lequel (Dieu aidant) je feray imprimer avec les vies des hommes illustres en guerre de nation Françoise.