B. L. CAIE JULES DE GUERSANS, auparavant nommé Julian Guersans, &c. natif de la ville de Gisors en Normandie, au diocese de Roüen , premierement Advocat au Parlement de Renes en Bretagne, & depuis Seneschal dudict lieu: cestui-cy dés ses plus tendres ans, fut instruit à Paris aux bonnes lettres, esquelles il profita tellement, qu'en fin il s'est rendu admirable à tous ceux de nostre siecle, tant pour sa memoire (qui sembloit quasi prodigieuse) que pour estre bien versé en tous arts, sciences, & disciplines, & ayant cognoissance de plusieurs langues. Je n'ay rien veu de ses escrits, qu'une Tragedie nommee Panthee, prise du Grec de Xenophon, imprimee à Poitiers par les Bouchets l'an 1571. encores dit il en son Epistre, adressee à Monsieur l'Evesque de Coutances son Mecene, qu'il ne la fait que mettre en ordre, mais en cet ouvrage se recognoist assez son stil & façon d'escrire. Il a escrit plusieurs autres Poëmes, entre autres un qu'il appelle les Cornes, qui est une louange des cocuz porte-cornes, &c. & plusieurs Poëmes sur le mariage de M. le Duc de Joyeuse non imprimez. Il a discouru devant la Majesté du Roy, de plusieurs belles choses, lesquelles ne sont imprimees. Il mourut de peste, à Renes le Jeudy cinquiesme jour de May l'an 1583. âgé de 38. ou 40. ans.