CLAUDE FAUCHET, Parisien, President en la Cour des Monnoyes à Paris l'an 1581. homme fort bien versé en la cognoissance de l'histoire, & entre autres de celle de nostre France, de laquelle il a escrit plusieurs livres, dont il y en a d'imprimez, comme nous dirons cy apres. Il a fait imprimer un recueil de l'origine de la langue & poësie Françoise, rithme, & Romans. Plus les noms & sommaire des oeuvres de 127. anciens Poëtes François, vivans avant l'an 1300. le tout imprimé par Mamert Patisson l'an 1581. à Paris. Il promet audict livre d'escrire un autre volume des Poëtes François, qui ont vescu depuis l'an de salut 1300. jusques à nostre siecle. Ce livre n'est encores imprimé. Les Antiquitez Gauloises & Françoises, imprimees à Paris chez Jaques du Puis. Traicté du Duel ou combat singulier, non imprimé. Il a traduit fort doctement & avec un travail infiny l'histoire de Cor. Tacite, imprimee à Paris chez Abel l'Angelier l'an 1582. 1583. & 1584. tant in fol. que in 4. & in 8. sans y avoir mis son nom, non plus qu'en son livre des Antiquitez Gauloises, dont nous avons parlé cy devant, tant il est peu curieux de gloire, mais seulement desireux de profiter au public. Il florist à Paris cette annee 1584. non sans travailler à illustrer la France, & les Gaules de ses plus belles Antiquitez, avec deliberation de faire imprimer plusieurs beaux volumes escrits à la main, lesquels sont en sa Bibliotheque, tant pour l'histoire de France que pour la poësie, dont il a un nombre infiny qu'il a recouvrez de toutes parts, avec une diligence merveilleuse.