Messire PIERRE SEGUIER, issu de l'ancienne famille des Seguiers à Paris, second President en la cour &c. homme tres-renommé pour son sçavoir & bonne vie, en quoy luy a succedé son fils Monsieur le Lieutenant civil du Chastelet de Paris, lequel administre si bien la Justice, & se porte tellement en sa charge, & a si grande cognoissance des affaires politiques (en un si bas âge comme il est) que celà le fait admirer de ceux qui ont cognoissance de sa valeur & de ses merites. Nous n'avons rien veu mis en lumiere des compositions & recueils faits par le susdit President, encores qu'il eust recueilly plusieurs beaux Arrests, & dressé des livres touchant le fait de la Justice. S'ils sont achevez, messieurs ses enfans ne delaisseront pas sans les faire voir à la posterité. Il mourut à Paris l'an 1580. âgé de 76. ans, le 25. d'Octobre, & est enterré en l'Eglise de S. André des Arts pres les Augustins, auquel lieu se voit un ample discours de sa vie, gravé en lettres d'or sur marbre noir, fait par A. Seguier son fils susdit.