Madame LAVRE OU LAVRETTE DE SADO, & selon aucuns de Chiabau, comme l'a escrit un Italien nommé Nicolo Franco. Cette dame Laure tant celebree par François Petrarque Florentin, estoit issue de la noble maison de Sade ou Sado, tant illustre en Avignon & par toute la Provence: elle nasquit en l'an 1314. le 4. jour de Juin. Elle estoit tresbien versee en la langue Provençale, usitee de son temps: & a escrit diverses sortes de Poësies en icelle, lesquelles ne sont encores en lumiere. Elle mourut en la ville d'Avignon l'an 1348. âgee de 34. ans. Qui voudra voir ses loüanges, voye les sonnets de ce divin Petrarque, tant renommé par toute l'Italie & autres lieux où ses oeuvres ont cours. Le Roy François premier escrivit ces vers qui s'ensuyvent, en faveur de laditte dame, lesquels luy servent d'Epitaphe ou tombeau. En petit lieu, compris vous pouvez voir, Ce qui comprend beaucoup par renommee: Plume, labeur, la langue, & le debvoir Furent vaincuz, par l'Aimant & l'Aimee. O gentill'Ame, estant tant estimee Qui te pourra loüer, qu'en se taisant? Car la parole, est tousjours reprimee, Quand le subject surmonte le disant. Je ne feray pas icy plus ample mention de laditte dame Laure, me reservant à en escrire plus amplement au traicté particulier que j'ay escrit de sa vie contenue avec celles de toutes les autres doctes & sçavantes femmes de France, desquelles j'ay escrit les vies, & en pretends faire un jour une Bibliotheque à part, contenant leurs vies & leurs compositions tant Latines que Françoises.