HIEROSME D'AVOST natif de la ville de Laval à 7. lieües de Victray en Bretagne, Officier de Madame Marguerite de France, Royne de Navarre, soeur du Roy Henry III. &c. Il a traduit for heureusement, & avec beaucoup de diligence, plusieurs Sonnets de Petrarque, imprimez à Paris tant en Italien qu'en François, chez Abel l'Angelier l'an 1584. avec plusieurs poësies de son invention, mises sur la fin de sa traduction desdits Sonnets. Il se delibere de continuer la traduction de tout le Petrarque entier, s'il voit que ce qu'il a mis en avant, soit bien reçeu: aussi n'a il intitulé son livre, que par ce nom d'Essais, &c. Il a traduit d'Italien en François, le Dialogue des graces & excellences de l'homme, ensemble de ses miseres & disgraces, imprimé à Paris chez Pierre Cheuillot l'an 1583. Il a traduit d'Italien en François les Amours d'Ismene escrits premierement en Grec, imprimez à Paris chez Nicolas Bonfons l'an 1582. Il a traduit le quatriesme Volume des Epistres de Guevare, lesquelles ne sont encores imprimees. Il a escrit plusieurs Quadrains de la mort, imprimez chez Jean le Clerc à Paris. Il florist à Paris l'an 1584. âgé de vingtsix ans.

HIEROSME D'AVOST de Laval, voy cy dessus Hierosme d'Avost par A.

HIEROSME D'AVOST de Laval, (duquel nous avons fait mention icy devant au premier alphabet.) Il a traduit d'Italien en François oultre les oeuvres cy dessus recitees, un livre qu'il a intitulé, les Elites & plus belles fleurs, recueillis de toutes les oeuvres spirituelles du R. P. Frere Loys de Grenade, de l'ordre des freres Prescheurs, &c. Ce livre est le plus spirituel, qui se soit encores veu en nostre langue. Il est divisé en six parties, à sçavoir, De la conversion du pecheur. De la misere de la vie humaine. De la contemplation. De l'oraison. De la Penitence, & ce qui en depend. Et de la tressaincte Communion. Il a davantage traduit d'Italien en François une Comedie du seigneur Loys Domenichi, laquelle il a intitulee les deux Courtisanes. Ces traductions susdites sont toutes mises au net, & sont prestes à imprimer, & mettre en lumiere: Ce que j'ay opinion qu'il fera ces prochains jours pour satisfaire aux curieux de si beaux ouvrages. Je ferois plus ample mention de luy, & de ses louanges, touchant ses traductions si heureusement faictes par luy de plusieurs livres Latins, Italiens, & Espagnols, si ce n'estoit qu'aucuns pourroient penser que ce qu'il a escrit, tant en ma louange en ses oeuvres, en fust cause. Il florist à Paris cette annee 1574. âgé de 25. ou 26. ans.