SIMON DE COMPIEGNE, moine de S. Richier en Ponthieu, autrement appellé Simon Greban, natif dudit lieu de Compiegne en Picardie, frere d'Arnoult Greban (duquel nous avons parlé cy dessus.) Voy cy apres Simon Greban, &c.

SIMON GREBAN Secretaire de Monsieur le Conte du Maine Charles d'Anjou, natif de Compiegne en Picardie, qui fut cause qu'il s'appella Simon de Compiegne, &c. frere d'Arnould Greban, chanoine en l'Eglise du Mans (comme nous avons dit cy dessus.) Il a continué le livre des Actes des Apostres, commencé par son frere Arnoul, lesquels furent joüez & representez en plusieurs villes de France, sçavoir est au Mans, à Angers, à Bourges, & autres villes: nous les avons par devers nous escrits à la main, & sont composez en vers François. Maistre Pierre Curet ou Cueuvret les a fait imprimer apres les avoir reveuz & corrigez, &c. Il a escrit plusieurs Elegies, complaintes, & deplorations sur la mort d'une Roine de France, desquelles fait mentionJean le Maire en ses poësies. Epitaphes sur la mort du Roy de France Charles 7. escrits en forme d'Eglogue ou pastoralle, imprimez à Paris. La Sphere du Monde qu'il appelle autrement les vertuz de l'Espere du Monde, imprimee avec un vieil Calendier, &c. Il a traduit par le commandement du Roy de France Philippes le Bel, un livre intitulé le Coeur de Philosophie, imprimé à Paris par Philippes le Noir l'an 1520. mais je ne sçay s'il y auroit point faulte au livre imprimé. Car s'il estoit ainsi, qu'il eust flory soubs le regne dudit Philippes & de Charles 7. ce seroit chose trop miraculeuse: qui est cause que je pense qu'il y ait faulte en l'impression du livre, qui dit sur la fin que ce livre du coeur de Philosophie aye esté traduit par ledit Simon Greban par le commandement du Roy Philippes le Bel: car c'est chose toute asseuree, qu'il florissoit soubs le regne de Charles 7. lequel mourut en l'an 1461. Nous avons plusieurs de ses compositions escrites à la main & non encores imprimees. Il mourut au Mans & est enterré en l'Eglise Cathedrale de S. Julien, devant l'image de S. Michel, auquel lieu se voyoit sa tombe avant les premiers troubles & seditions pour la religion.