JAQUES COEVR, Baron de sainct Forgeau, natif de Bourges en Berry, Thresorier & Argentier du Roy de France Charles 7. en l'an de salut 1453. en laquelle annee fut prononcé un arrest ou sentence, donnee contre luy, pour plusieurs choses qu'on luy a mises à sus, & ne sçay si elles sont vrayes: somme qu'il fut condamné à payer la somme de quatre cens mille escuz, & tous ses biens confisquez, & encores declaré inhabile à tenir estats, & banny pour jamais du Royaume de France. Plusieurs ont pensé qu'il sçavoit faire la pierre Philosophale, & que les pieces d'argent nommees de son nom & appellees vulgairement des Jaques Coëurs, avoient esté faictes & fabriquees par son invention, mais nous deduirons cecy bien amplement au discours des vies que nous avons escrites des Thresoriers de France. Or pour venir à parler de ses escrits, voicy ce que j'ay veu de son invention. Le calcul ou denombrement de la valeur & revenu du Royaume de France, fait par ledit Argentier, & baillé à son maistre le Roy Charles 7. lequel se voit au livre de Jean Bouchet de Poictiers, intitulé le Chevalier sans reproche, & encores au livre de Jaques Signet, intitulé la Division du Monde. Il a escrit plusieurs autres memoires & instructions, pour policer l'estat & maison du Roy, ensemble tout le Royaume de France, mais ils ne sont encores imprimez.