B. L. CHARLES DU MOULIN OU MOLIN, Parisien, surnommé Symon Chaludre, qui est son anagramme, & soubs lequel nom il a mis quelques oeuvres en lumiere, comme nous dirons cy apres. Il a esté reputé l'un des plus grands Jurisconsultes de son temps & des mieux versez en l'histoire saincte & prophane, outre qu'il a escrit plusieurs livres en Latin, il en a aussi beaucoup composé en nostre langue: sçavoir est, le Traicté de l'origine, excellence & progrez du Royaume de France, &c. imprimé à Lyon l'an 1561. à la Salemandre. La conference & union des quatre Evangelistes, imprimee l'an 1565. Catechisme ou sommaire de la doctrine Chrestienne, escrit en Latin & en François par ledict du Moulin, & mis en Grec par Loys de Villereau G. Chartrain. Defense dudict Charles du Moulin, & autres hommes doctes, contre les Calvinistes, &c. soubs le nom de Symon Chaludre, qui est l'anagramme d'iceluy Charles du Molin. Il a escrit plusieurs autres oeuvres, tant sur le droict, que sur autres matieres, comme il se peult voir au privilege mis devant son livre de la Monarchie des François, &c. Il mourut à Paris en Decembre l'an 1566.

B. L. SIMON CHALLVDRE, Parisien professeur des sainctes lettres, &c. Il a escrit la defense de Charles du Molin, ancien docteur és droits, & autres gens de sçavoir & pieté, &c. contre les calomnies des Calvinistes & Ministres de leur secte, abuz, usurpations, & erreurs d'iceux, le tout imprimé en divers lieux. Faut noter icy que c'est Charles du Molin qui est autheur de cette defense pour luy mesme, & que c'est un nom supposé & inventé que le susdit Simon Challudre. Car ce n'est qu'un anagramme ou nom retourné de Charles du Molin, comme pourront voir ceux qui y voudront prendre garde. Nous avons parlé cy devant de Charles du Molin à la lettre de C. Il mourut l'an 1566.