B. L. ELIE VINET natif de Barbezieux en Xaintonge, homme fort docte és Mathematiques, & consommé en plusieurs autres arts, & sciences: grand historien & Philosophe, &c. principal du college d'Aquitaine à Bordeaux, &c. Il a escrit un traité des Arpentages, ou mesures par arpent, imprimé à Bordeaux par Symon de Millanges, l'an 1577. Les Antiquitez de Bordeaux & de Bourg, imprimees par Millanges à Bordeaux l'an 1565. & depuis reveues & augmentees par ledit Vinet & imprimees audit lieu l'an 1574. Antiquitez de Xaintonge, Angoulmois, & autres lieux d'alentour, imprimees. Il florist à Bordeaux ceste annee 1584. âgé de pres de 80. ans & ne cesse de composer tous les jours. Je feray mention de ses oeuvres Latines autre part.

B. L. HELIE VINET, Xaintongeois, homme for docte. J'ay parlé de luy cy devant à la lettre E, auquel lieu son nom se voit escrit par E, sans aspiration, en cette sorte Elie Vinet &c. J'avois obmis à dire de luy qu'il a traduit de Grec en François, la Sphere de Procle, imprimee à Poictiers par les Marnefs l'an 1544.