Philippe de Luxembourg (1445-1519)

Référentiel d'autorité Biblissima : https://data.biblissima.fr/entity/Q19063

Notice bibliographique

Source des données : Bibliothèques françoises

Messire PHILIPPES DE LVXEMBOVRG, Cardinal & Evesque du Mans, issu de la tresillustre maison des Princes de Luxembourg, &c. Il nasquit en l'an 1446. au diocese d'Arras en la Gaule Belgique. Il estoit fils de Tibault de Luxembourg seigneur temporel de Fiennes au diocese de Theroüenne en Picardie, & de Madame Philippes de Meleun , fille du sieur d'Antoing Jean de Meleun (comme nous avons deduit bien plus amplement és vies des Evesques du Mans, & en la genealogie de la tresillustre & ancienne maison des Princes de Luxembourg.) Cettuy-cy nommé Philippes est fondateur du college du Mans, situé en l'Université de Paris, & a basty plusieurs superbes palais, & maisons somptueuses: & entre autres le chasteau d'Yvray l'Evesque, à une lieuë du Mans, ensemble le college de S. Benoist au Mans: & ne sçay pourquoy ses armes n'y sont comme és autres lieux qu'il a edifiez, sinon que ses executeurs de testament ont voulu avoir la gloire apres sa mort des choses qui devroient estre en commemoration dudit Cardinal, comme entre autres de ce college situé en laditte ville, lequel fut basty des deniers dudit Evesque, & toutesfois un chanoine du Mans y a fait mettre ses armes, & non celles dudit Cardinal. Pour revenir à parler dudit seigneur, je n'ay rien veu de ses escrits, qu'un Testament fait quelque temps apres son trespas, ensemble quelques pardons & indulgences, touchant les sept stations en l'Eglise du Mans, lesquelles il obtint du Pape, lors qu'il estoit legat. Il mourut le 22. jour de Juing l'an 1519. âgé de 74. ans. Il est enterré en l'Eglise de S. Julien du Mans: ses armes sont d'argent au Lyon de gueulles, à la queüe fourchee & noüee, ou passee en sautoir, escartelees de la maison des Baux en Provence, qui sont d'argent à l'estoille de gueulles à 16. rais ou rayons, lesquelles j'ay expressément blasonnees, à cause que l'on voit une infinité d'endroits au Maine & autres lieux où elles sont depeintes.

Autres personnes citées dans la notice :

Dans sa bibliothèque

Sources des données