F. R. Parisien. Il a escrit un Epithalame sur le mariage du Roy, & de la tres-excellente Princesse Loyse de Lorraine, imprimé chez Denis du Pré l'an 1575. avec le sacre & coronnement dudit Roy.

FRANCOIS ROSE Parisien, &c. Nous avons fait mention cy dessus d'un nommé François Rose, & pensions que ce fust celuy qui est du jourd'huy Evesque de Senlis, & grand maistre du college de Navarre fondé à Paris, &c. & avions encores laissé par escrit qu'il estoit autheur d'un traicté de la genealogie de la maison de Montmorency, mais j'ay depuis receu advertissement par monsieur le Digne, son intime amy, que ledit Evesque de Senlis s'appelloit Guillaume Rose, & qu'il estoit natif de Chaumont en Bassigny, dequoy j'advertis ceux qui liront ce livre, & celà sera corrigé à la seconde edition: & encores pour advertir mieux les lecteurs, nous avons fait adjouster un apostile en marge pour le mieux donner à entendre, lequel il a fallu imprimer de rechef: car la fueille estoit ja tiree, lors que nous avons receu cet advertissement. Nous ferons plus ample mention de cecy, lors que nous serons à la lettre de G. quand nous parlerons de Guillaume Rose, &c.