JAQUES IVER, sieur de Plaisance & de la Bigottiere, Gentilhomme Poictevin. Il a escrit un livre extremement bien venu, & recueilly des hommes d'esprit, & d'entendement, lequel il a intitulé le Printemps d'yver, qui est un oeuvre contenant cinq histoires escrites en autant elegant stil, que nous en ayons veu de nostre temps, imprimé à Paris par Jean Ruelle l'an 1572. & par autres diverses fois: la suitte ou continuation de ce liure, monstre bien que ce n'est pas de sa façon, car elle ne semble pas au commencement: ou bien il a esté imprimé sur la minutte, ou plustost broüillard, non encores mis au net par l'autheur de cet oeuvre. Je n'ay jamais eu cet heur de le voir ou cognoistre que par ses escrits mis en lumiere, mais c'est celuy que j'ay desiré extremement voir & communiquer avec luy, tant j'ay pris de plaisir à sa façon d'escrire. Il mourut avant que son livre fust imprimé, & à l'imitation ou plustost pour la gloire qu'avoit receuë l'autheur pour son livre, il s'en est trouvé un qui a escrit l'Esté, lequel s'appelle Benigne Poissenot duquel nous avons parlé cy devant.