JAQUES BROCHIER, natif de Pertuys en Provence, jeune homme for docte és Mathematiques, & grand Astrologue. Il a escrit la Prognostication pour l'an 1570. en laquelle sont inserees dix figures celestes, sur l'elevation du Meridian de Paris, imprimee à Paris l'an 1569. par Nicolas du Mont. Il a escrit l'Almanach pour l'an 1570. calculé sur l'elevation de 48. degrez, avec les presages de ladite annee, avec quatre figures celestes, & encores avec l'Almanach de la cour du Parlement de Paris, & autres choses singulieres, le tout imprimé par ledit Nicolas du Mont l'an 1570. Il florissoit à Paris l'an 1569.